Шинэ троллейбус аяны замд гарлаа

Манай иргэд өөрсдийн гараар бүтээ­сэн троллейбусаар уржигдраас эхлэн зорчиж эхэллээ. Тэнгэрийн цэнхэр өнгө­тэй “JEA800” нь дулаахан, тохилог, мөн шугамнаас гарч болох юм байна.

Тэр дундаа хотын төвд замын түгжрэл их үүссэн үед шинэхэн троллейбус маань шугамнаас гарч 3-10 км замыг туулах бүрэн бололцоотой аж. Цахилгаан тээвэр компанийнхан өнгөрсөн бямба гаригийн морин цагт ёслол төгөлдөр өөрсдийн га­раар өлгийдсөн анхны “хурдан унаа”-г алтан шар замд гаргасан. Анхны зор­чигчид нь хэвлэл мэдээллийнхэн болон Зам тээвэр, аялал, жуулчлалын яам, кондукторууд байв.

Ерөнхий сайд анхны зорчигч болох байсан ч ажилтай гээд хүрэлцэн ирж амжсангүй. Нэгэн кондук­тор бүсгүй анхны билет гэж бэлгэшээн тасалбарынхаа ард энэ өдрийн он сарыг бичиж хадгалж байгаа харагдсан. Дотоо­дын хүч бололцоогоо ашиглан ийм тээв­рийн хэрэгсэл бүтээсэнд олон хүн баяр­тай байсан. Троллейбус гэхэд салхи та­туулан хурд­лан давхих “JEA800” нь ма­най улсад тө­дийгүй олон улсын хүрээнд шинэ стан­дартыг бий болгожээ.

Актлагд­сан орос автобусны арамыг ашиглаж дэвшилтэт техник технологийг нэмж үүнийг бүтээжээ. Нэрнээсээ эхлээд утга учиртай. “JEA800” нь Цахил­гаан тээвэр компанийн захирал Д.Жаргал­сайхан, ерөнхий инженер С.Эрдэнэтовч, цахил­гаан хангамж троллейбусны засварын албаны дарга Ч.Ариунбат нарын нэрний эхний үс­гээс үүдэлтэй. 800 гэдэг нь Их Монгол Улс бай­гуулагдсан ойн хүрээнд бэлгэдэж нэрийд­жээ. Хуруу хумсаа хугалан байж Цахилгаан тээвэр компанийнхан 60 гаруй сая төгрөгийн өртгөөр үүнийг хийж чадсан.

Хэрэв гад­наас ийм хүчин чадлын троллейбус авчир­вал 250 орчим ам.доллар юм бай­на. Цаашид эх орондоо хийх бүрэн боломжтой. Сэлбэг хэрэгсэл нь ч бий. Гагц­хүү хөрөнгө мөнгөний асуудал түвэгтэй байгаа гэнэ. Юутай ч Нийс­лэлийн төсөвт 10 ийм троллейбус хийх мөнгийг суулгаж өгнө үү гэсэн хүсэлтийг илгээгээд байгаа аж. Цахилгаан тээвэр компанид төрөөс олгох татаасаа бүрэн гүйцэд өгдөггүйгээс санхүүгийн хүндрэл­тэй байдалд ордог талаар ярьсан.

Хэрвээ төрөөс манай компанийг дэмжсэн бод­лого явуулбал бид байгаль экологид хор нөлөөлөлгүй үнэ хямд тохилог унаагаар иргэддээ үйлчилж чадна гэдгээ ам бардам хэлэх. Үнэхээр бензин шатахуун хэрэглэдэггүй эрчим хүчээр явдаг троллейбус манайд олон байвал сайнсан. 124 хүн тээвэрлэх боломжтой. Дотроо 31 суудалтай. Хуучин троллейбустай харьцуулвал:

- эрчим хүчний зарцуулалт 40 хувь буурсан
- цахилгаан хөдөлгүүрүүдийн дуу чимээ байхгүй болсон
- зорчигчдын тав тухыг хангасан 14 инчийн зурагт, стеро хөгжимтэй
- зааланд нэмэлт халаагуур тавьсан дулаахан

гэх мэт давуу талууд бий гэж зохион бүтээгчид ярьж байв. Анхны жолооч болох Д.Батсайхан, М.Төмөрбат нар сэтгэгдэл өндөр байв. Цагаан бээлий, дүрэмт хувцас саравчит малгай духдуулсан тэднийг харахад олон нийтэд үйлчлэх хүмүүс ийм баймаар юм даа гэж бодогдсон. Аль 19 жилийн өмнө анхны улаан троллейбусыг ОХУ-аас хүлээн авч байсан бол өдгөө цэнхрийг Монголчууд өөрсдөө бүтээлээ. “JEA800” ханын материалаас офицеруудын ордон II номерын чиглэлд явж эхэллээ.

Банзрагчийн Долзодмаа