Тавантолгойд салаа төмөр зам тавина

Тавантолгойн ордыг хэрхэн ашиглах талаар тохиролцоонд хүрч Монгол Улсын Засгийн газар “Энержи ресурс” консерциумтай гэрээ байгуулсан. Энэ гэрээний хүрээнд дэд бүтцийн асуудлыг яаралтай шийдэж Тавантолгойн ордыг аль болох богино хугацаанд ашиглалтад оруулах талаар хоёр тал санаачлагатай ажиллаж байгаа аж.

Тавантолгойн нүүрсний ордыг ашиглаж эхлэхэд нэн түрүүнд шаардлагатай дэд бүтэц нь Ухаа худагаас Нарийн сухайт хүртэл шинээр тавих төмөр зам. Энэ асуудлыг Засгийн газрын өчигдрийн хуралдаанаар хэлэлцжээ.

Ухаа худагаас Нарийн сухайт хүртэлх 270 километр урт төмөр зам тавих хөрөнгийг “Энержи ресурс” консерциум гаргах юм байна.

Засгийн газар Тавантолгойн ордын ашиглалтыг түргэвчлэх, олборлолтыг аль болох хурдан хугацаанд эхлүүлэх бодлого барьж байгаагийн хувьд энэхүү салаа төмөр замыг барьж байгуулах асуудлыг дэмжжээ.

Тиймээс Засгийн газраас эрхийг нь олгосон учир Ухаа худаг-Нарийн сухайтын чиглэлийн төмөр замын ажлыг эхлүүлэх асуудлаар “Энержи ресурс”-ынхэн ойрын үед ЗТАЖЯ-тай гэрээ, хэлцэл байгуулах юм байна. Уг төмөр замыг барьж байгуулах ажилд Засгийн газар хатуу хяналт тавих аж.

Г.Сонинбаяр